БИШКЕК, 8-июн. — Sputnik. Бишкекте өтүп жаткан Азия кубогуна тандоо этабындагы Кыргызстан — Сингапур курама командаларынын беттешинде талаа ээлери атаандашын 2:1 эсебинде жеңди.
Биринчи голду Кыргызстандын курама командасынын капитаны Валерий Кичин пенальти менен киргизип, эсепти теңеген. Андан бир нече мүнөт өтпөй Виктор Майер экинчи голду киргизип, эсепти 2:1 кылды.
Буга чейин экинчи таймдын башталышында (56-мүнөттө) сингапурдук футболчулар кыргызстандыктардын дарбазасына топ киргизип, эсепти 1:0 кылып ачкан.
Оюн аяктагандан кийин стадиондогу күйөрмандар бир нече мүнөт "ак шумкарларды" – Кыргызстандын курама командасынын футболчуларынын урматына кол чаап, ышкырып, барабан кагып, желектерди булгалап ыраазылыгын билдиришти.