БИШКЕК, 6-июн. — Sputnik. Тышкы иштер министри Жээнбек Кулубаев Кытай Эл Республикасынын Мамлекеттик кеңешинин мүчөсү, тышкы иштер министри Ван И менен жолугушканын ТИМдин маалымат кызматы кабарлады.
Дипломаттар Нур-Султан шаарында "Борбордук Азия – Кытай" форматындагы тышкы иштер министрлеринин 3-жыйынынын алкагында сүйлөшкөн.
Талкууланган маселелер:
Кыргызстан менен Кытайдын ортосундагы соода-экономикалык мамилелерди мындан ары чыңдоонун маанилүүлүгүнө өзгөчө маани берди;
Кытай — Кыргызстан — Өзбекстан темир жолун куруу долбоорун ишке ашыруу боюнча биргелешкен иштерди активдештирүүгө өзгөчө көңүл бурулду;
Тараптар Бишкек шаарынын жолдорун реконструкциялоо жана КЭР өкмөтүнүн гранттык каражатынын эсебинен Кыргызстандын ирригациялык системасын жакшыртуу долбоорлорун жылдыруу маселесин талкуулашты;
Кыргыз — кытай мамлекеттик чек арасындагы өткөрмө пунктулардагы соода жана жүк ташуу көлөмүн көбөйтүүгө аракеттенүү макулдашылды;
Кытай тарап Кыргызстандан экологиялык жактан таза айыл чарба продукциясын импорттоого кызыкдар экенин билдирди;
Тараптар ошондой эле эки өлкөнүн ортосундагы аба каттамдарын жандандыруу жана жарандардын өз ара катташуусуна коюлган чектөөлөрдү алып салуу маселелерин карашты.
Жолугушуунун соңунда Кулубаев Ван Ини Кыргызстанга келип кетүүгө чакырган.
