БИШКЕК, 3-июн. — Sputnik. Мүмкүнчүлүгү чектелген балдар үчүн Бишкекте жаңы реабилитациялык борбор ачылат. Бул тууралуу Эмгек, социалдык камсыздоо жана миграция министрлигинин маалымат кызматынан кабарлады.
Аталган борбор Жибек Жолу 519, 521 дарегинде жайгашкан, мурдагы президент Курманбек Бакиевдин үйү болгон имаратта болору айтылды.
"Бул жайды өткөрүп берүү аяктагандан кийин мүмкүнчүлүгү чектелген балдар үчүн акысыз реабилитациялык борбор ачуу ишин баштайбыз. Өзгөчө баласы бар ар бир үй-бүлө жеке кызматтарга акы төлөй албастыгын баарыбыз билебиз. Эми мамлекет заманбап борбордо сапаттуу кызматтарды акысыз көрсөтөт. Борбор бир эле учурда 100гө чейин баланы кабыл ала алат", — деген социалдык камсыздоо жана миграция министри Кудайберген Базарбаев.
Андан сырткары, 1-июндан баштап жеке жардамчынын кызматын балдар гана эмес, 18 жаштан жогору ден соолугунан мүмкүнчүлүгү чектелген адамдар да ала алышарын кошумчалаган.
"Президенттин жарлыгы менен биринчи жолу чоң кишилерге жана майыптыгы бар балдарга жөлөк пул, ошондой эле өзгөчө балдарын багып жүргөн ата-энелерге, жеке жардамчыларга төлөмдөр көбөйтүлдү. 1-июндан баштап жеке жардамчынын кызматын балдар гана эмес, 18 жаштан жогору ден соолугунан мүмкүнчүлүгү чектелген адамдар да ала алышат", — деген ал.
Министрликтин маалыматына таянсак, бүгүнкү күндө Кыргызстанда 32 миң майып бала жашайт.