БИШКЕК, 3-июн. — Sputnik. Россияга каршы жаңы санкциялар азык-түлүктү жеткирүү боюнча көйгөйлөрдү жаратып, тамак-аш коопсуздугуна коркунуч туудурат. Бул тууралуу Россиянын АКШдагы элчиси Анатолий Антоновго шилтеме берип РИА Новости жазды.
2-июнда АКШ россиялык ондогон адамга жана ишканаларга каршы санкция кабыл алган. Алардын арасында министрлер, ишкерлер бар. Ал эми мекемелер тууралуу айтсак, аба жана суу кеме куруу тармагындагы ишканалар АКШда чыккан техниканы эми ала алышпайт.
"Чектөө практикасы дүйнөдөгү абалды курчутат деген пикирдебиз. Бул жеткирүү чынжырын кайрадан үзгүлтүккө учуратып, азык-түлүк коопсуздугуна таасирин тийгизет", — деди Антонов.
Элчи кээ бир товарлардын жетишсиздиги ансыз да кыйнала баштаган Кошмо Штаттардын өзүнө экономикалык терс таасирин тийгизиши мүмкүн экендигин айтты.
Дипломат билдиргендей, Россия чектөөлөр менен тыюу салуулардын фонунда да өзүнүн карыздык милдеттенмелерин аткарууга даяр.
"Россиянын төлөмдөрдү жүргүзүү мүмкүнчүлүгүнө бөгөт коюу аракети олуттуу инвесторлордун көз жаздымында калбайт. Тескерисинче, АКШнын өзүнө болгон ишенимди кетирет", — деп сөзүн жыйынтыктады элчи.
24-февралдан бери Россия Украинаны демилитаризациялоо боюнча атайын операция жүргүзүп жатат. Владимир Путин анын максатын "сегиз жылдан бери Киев режими тарабынан бейбаштыкка жана геноцидге дуушар болгон адамдарды коргоо" деп атаган.
Ошол учурдан бери улам бир санкцияларын киргизип келе жаткан Батыш өлкөлөрү жакында санкциялардын алтынчы пакетин жарыяларын билдирген.