БИШКЕК, 3-июн. — Sputnik. Токтогулда Lexus-470 үлгүсүндөгү унаа Чычкан суусуна түшүп кеткен. Бактыга жараша, адам өлүмү катталган жок. Бул тууралуу ӨКМдин маалымат кызматы кабарлады.
© Фото / пресс-служба МЧС КР
Билдирмеге караганда, кырсык 2-июнда Жалал-Абад облусунун Токтогул районунда Бишкек — Ош унаа жолунун 275-чакырымында катталган.
"Автоунаанын ичинде беш адам болгон, анын ичинен экөө жеңил жаракат алып, Тез жардам кызматы менен ооруканага жеткирилген. Каза болгондор жок", — деп айтылат маалыматта.
Кырсык болгон жерге ӨКМдин беш куткаруучусу, бир жүктөгүч жана ИИМден бир экипаж тартылып, автоунааны суудан чыгарып ээсине өткөрүп беришкен.