БИШКЕК, 1-июн. — Sputnik. TikTok социалдык тармагы Роскомнадзордун кийлигишүүсүнөн кийин Sputnik Кыргызстан агенттигинин аккаунтун калыбына келтирди.
Бүгүн эртең менен TikTok аталган агенттиктин баракчасын эч себепсиз блоктоп салган. Sputnik.kg профили жабылып, бардык видеолору өчүрүлгөн. Белгилей кетсек, редакция соцтармактын эрежелерин бузган эмес. Баракчанын жабылышына эмне себеп болгону белгисиз. Sputnik Кыргызстан агенттигинин башкы редактору Эркин Алымбеков соцтармактын мындай аракетинде саясий боек бар болушу мүмкүн экенин болжоду.
Роскомнадзор аккаунтту калыбына келтирүү талабын коюп TikTok соцтармагына кайрылды. Натыйжада ошол эле күнү аккаунт менен бардык видеороликтер калыбына келтирилди.
Sputnik аккаунтунун 100 миңден ашык катталуучусу бар жана Кыргызстандагы ЖМКлардын ичинен ири TikTok баракча болуп эсептелет.
Аскердик атайын операция башталгандан бери YouTube Sputnik менен RT ЖМКларына тиешелүү бардык каналдардын ишине бөгөт койгон. Ошондой эле RT телеканалынын немец тилиндеги аккаунту дагы өчүрүлгөн.