БИШКЕК, 30-май — Sputnik. Семиздик жана өнөкөт панкреатит экинчи типтеги кант диабетинин өрчүшүнө алып келет. Бул туурасында "Известия" басылмасы Москва облусундагы Владимирский илимий изилдөөчү клиникалык институтунун илимий кызматкери Наталья Балашованын айтканына таянып жазды.
"Кооптуулукка алып келген нерсе — курамында углеводу бар жана майлуу тамакты ашыкча жеп алуу. Андан сырткары, өнөкөт панкреатит менен жүргөн, анысы кармап кала турган адамдарда мындай тобокелдик бар", — деген дарыгер.
Балашова мындан сырткары абдоминалдык семирүү, тагыраагы, ичи чыгып, курсакта май пайда болгон адамдарда да экинчи типтеги кант диабетине чалдыгуу кооптуулугу жогору экендигин айтты.
Аз кыймылдаган, көп баспаган, майлуу жана курамында углеводу көп азыктарга өзгөчө басым койгондорду аталган дарттын айланчыктап жүрөрү айтылды.
Медик кант диабетинин үч түрү бар экендигин түшүндүрүп берди.
Биринчи типтеги диабет балдарда, өспүрүмдөрдө пайда болот. Бул уйку безинин инсулинди иштеп чыгууга тубаса же кийин пайда болгон жөндөмсүздүгүнөн жаралат.
Экинчи типтеги диабет негизинен толук, ашыкча салмагы бар жана уйку бези жабыркаган улгайгандарда пайда болот.
Ал эми үчүнчү тиби кандагы канттын деңгээлинин бузулушунан улам кош бойлуу аялдарда кездешет, бирок адистин айтымында, бул утурумдук көрүнүш.