БИШКЕК, 28-май — Sputnik. Европанын Россия мунайына чектөө киргизүүсү Германияга олуттуу терс таасирин тийгизет. Эгер Москва газды Германияга экспорттоону токтотууну чечсе, анда Берлиндин экономикасы кыйрайт. Бул тууралуу Бундестагдагы "АдГ" партиясынын депутаттары Германиянын өкмөтүнө кайрылуусунда билдиришкенин РИА Новости жазды.
Анда депутаттар Россияга каршы санкцияларды кабыл алуу биринчи кезекте европалыктардын жашоосуна залакасын тийгизерин белгилешкен.
"Германиянын бизнеси жана эли үчүн мунун кесепети оор жана катаал болот", — деп жазган эл өкүлдөрү.
Депутаттар Россия мунайына чектөө киргизүү Москваны жооп иретинде чара көрүүгө түртө турганын айтып, Россия Европага жаратылыш газын токтотуп коюшу ыктымал деп кооптонушкан.
"Жыйынтыгында газ тартыш болуп, бул Германия экономикасынын кыйроосуна алып келет", — деген алар.
Мындан улам "АдГ" партиясынын депутаттары өкмөттү Украинадагы кырдаалдан улам мунай сатууга таасир эткен санкциялардан баш тартууга чакырган.
Россия Украинадагы атайын операцияны 24-февралда баштаган. Кийинчерээк ага жооп катары Батыш өлкөлөрү Москвага катар-катар санкцияларды салып, анын кесепети кайра Европанын өзүнө тийди. Күйүүчү май кымбаттап, Европа андан улам пайда болгон азык-түлүк инфляциясына кабылды. Каатчылык, кымбатчылыктан жөнөкөй эл жапа чегип, нааразы болууда.