Буга чейин Евразия өнүктүрүү банкы (ЕАӨБ) Кыргызстанда курула турчу күн станциясын каржылоого ниеттенип жатканын билдирген. Көп тараптуу келишимге кол коюлуп, анын катышуучуларынын бири "Бишкек Солар" компаниясы болгон.
Долбоор жөнүндө эмне белгилүү?
Станциянын кубаттуулугу 50 мегаватт болуп, жылына 91 миллион киловатт-саат электр энергиясын иштеп чыгат. Объект Ысык-Көл облусунун Ысык-Көл районунда жайгашмакчы. Каржылоонун алдын ала суммасы 40 миллион долларды түзөт.
Ысык-Көлдөгү башка күн станциялары
Бирок бул Ысык-Көл облусундагы күн станциялары тууралуу биринчи маалымат эмес.
8-апрелде 1000 мегаваттык күн электр станциясын куруу боюнча инвестициялык келишимге кол коюлган. Документке Энергетика министрлиги, Экономика министрлиги, Кытайдын CPID жана CR20G энергетикалык компанияларынын өкүлдөрү кол коюшкан;
ушул эле күнү күн станциясын жана 260 мегаваттык ГЭСти куруу боюнча меморандумга кол коюлду. Иш-чарага энергетика министри жана Испаниянын "Экоэнер" энергетикалык компаниясынын өкүлдөрү катышкан;
апрель айынын аягында Тору-Айгыр айылында Кыргызстандагы биринчи күн электр станциясынын капсуласын салуу аземи өткөнү тууралуу маалымат чыккан. Курулушту "Бишкек Солар" ишканасы баштаган, долбоор мамлекеттик-жеке өнөктөштүктүн алкагында ишке ашууда. Жылына болжолдонгон 600 миллион киловатт-саат, кубаттуулугу 300 МВт болгон күн электр станциясын куруу пландаштырылууда.
Sputnik бул тууралуу маалымат алуу үчүн "Bishkek Solar" ишканасынын директору Азамат Искембаевге кайрылды.
Жыйынтыгы кандай болду?
Искембаев апрель айынын аягында капсула салынган Тору-Айгыр айылындагы ушул эле станциянын курулушунун биринчи этабын ЕАӨБ каржылай турганын билдирди.
"50 мегаваттык станциянын курулушу биринчи этап болуп саналат, ал эми ЕАӨБ тарабынан каржыланат", — деди Искембаев.
Анын айтымында, күн электр станциясынын пландалган кубаттуулугу 300 мегаватт болот жана долбоорду андан ары ишке ашырууга башка инвесторлор да катышышы мүмкүн.