Богок оорусу десе эле элде көзү чанагынан чыккан, арыктаган кишини элестетишет. Бирок аталган илдеттин түрү көп. Учурда өлкөдө түйүндүк богок оорулары көп катталууда. Бул тууралуу Кайыргүл Жоошбаева Sputnik Кыргызстан радиосунда маек куруп жатып билдирди.
Анын айтымында, кош бойлуу аялдарда йоддун жетишсиздиги түйүлдүктүн мээ, нерв системаларынын калыптанышына терс таасирин тийгизет.
"Калкан бези көпөлөктүн формасында адамдын тамагында жайгашкан без. Ал биздин организмибиздеги гормондорду жөнгө салып турат. Салмагы 15-20 милиграмм болгон бул кичинекей органдын адам жашоосу үчүн өтө маанилүү. Анын нормада иштөөсү үчүн йод керектелет. Ал эми биздин өлкө тоолуу аймак болгондуктан климатыбызда йод жетишсиз. Бул көйгөйдү чечүү үчүн тузду, унду йоддоштуруп келебиз. Эл мына ушул йоддолгон туз жана унду туура сактоого көңүл бурушу керек. Оозун ачык калтырбай, күн тийген же нымдуу жерде сактабай, тузду тамак бышарга аз калганда гана сээп коюу зарыл. Йоддун жетишсиздиги биздеги гормондордун иштешин жөнгө салып турган калкан безинин ишине терс таасирин тийгизип, адамда зат алмашуу бузулат. Анын кесепетинен жүрөк-кан тамыр оорулары жана башка көптөгөн олуттуу илдеттер пайда болушу мүмкүн. Ал тургай калкан бези такыр иштебей калса адам акырындык менен комага түшүп калат",— деди Жоошбаева.
Дарыгер йодду тамак-ашка туура колдонуу боюнча малыматтарды калкка кенен жайылтуу зарылдыгын кошумчалады.