Буга чейин Кыргызстандын аймактык товарлары өз географиялык уникалдуулугун товар чыгарылган жердин аталышы (НМПТ) катары гана мыйзамдаштыра алган. Бул өтө татаал каттоо процедурасы жана өндүрүүчүгө катуу талаптарды коёт. Эми "Товардык белгилер, тейлөө белгилери, географиялык көрсөткүчтөр жана товар чыгарылган жердин аталыштары жөнүндө" мыйзамынын жаңы редакциясы кабыл алынгандан кийин белгилүү бир региондо өндүрүлгөн уникалдуу товарды географиялык көрсөткүч катары каттоого мүмкүнчүлүк түзүлөт. Ага ылайык, товарларды каттоо процедурасы жөнөкөйлөштүрүлөт. Бул тууралуу Гүлбара Кудайбердиева Sputnik Кыргызстан радиосунда маек куруп жатып билдирди.
Анын айтымында, регионалдык өндүрүүчүлөр өз продукциясын коргоо үчүн географиялык көрсөткүчтөрдү колдонуу укугуна ээ.
"Географиялык көрсөткүчөр интеллектуалдык менчиктин объекти катары өлкөбүз үчүн, ата мекендик продукцияны өндүргөн фермерлер, ишкерлер, чакан жана орто бизнес, ошондой эле региондорду өнүктүрүү үчүн абдан маанилүү. Ошондуктан "Товардык белгилер, тейлөө белгилери, географиялык көрсөткүчтөр жана товар чыгарылган жердин аталыштары жөнүндө" мыйзамынын жаңы редакциясы иштелип чыкты. Мында "географиялык көрсөткүч" сыяктуу көптөгөн жаңы түшүнүктөр киргизилет. Регионалдык өндүрүүчүлөр өз продукциясын коргоо үчүн географиялык көрсөткүчтөрдү колдонуу укугуна ээ болуп, ички рынокко да, эл аралык рынокко да тайманбай чыга алышат. Ошол эле учурда алар ар кандай жасалмалардан корголот. Демек, Кыргызстанда Токтогул же Ат-Башынын балы, Өзгөн же Баткен күрүчү, Оштун самсасы, Караколдун ашлям-фусу жана башка географиялык абалга байланыштуу бренддер ортого чыгат. Мыйзам кабыл алынса биздин ишкерлерге мындай брендди расмий каттоого мүмкүнчүлүк түзүлөт. Географиялык көрсөткүч бренд катары аймактагы ассоциациялар же башка бизнес-ассоциациялар тарабынан гана катталышы мүмкүн. Башкача айтканда, бир эле бизнесмен бренд ала албайт. Бул үчүн продукт өндүрүүчүлөрдүн тобу биригип брендге ээ боло алат. Бренд катары көрсөтүлүп жаткан географиялык көрсөткүч ошол аймакка гана тиешелүү, уникалдуу продукт болууга тийиш", — деди Кудайбердиева.
Ал продукциянын келип чыгышынын географиялык көрсөткүчү товар өндүрүүчүгө кошумча киреше алып келерин кошумчалады.
Подкасттын толук вариантын төмөнкү видеодон көрүңүз: