БИШКЕК, 24-май — Sputnik. Молдованын мурдагы президенти Игорь Додон 72 саатка кармалды. Бул тууралуу прокуратуранын Telegram-каналына таянып Sputnik Молдова кабарлады.
РИА Новости билдиргендей, шейшемби күнү эртең менен Коррупцияга каршы прокуратурасы менен Маалымат жана коопсуздук кызматы Додондун үйүн тинтип жатканы белгилүү болгон.
Мындан тышкары, ал Социалисттер партиясынын мурдагы лидери. Аталган партия Додонду колдоо максатында акция өткөргөн.
Митингге 600-700дөй адам чогулуп, башка каалоочулар Кишиневго жол жабылып калгандыктан, келе албай калганын айтышкан. Чогулгандар колдоруна "Оппозициядан колуңарды тарткыла", "Акыйкат юстиция үчүн" деп жазылган плакаттарды көтөрүп алганын видеодон көрүүгө болот.
Акциянын катышуучулары өлкөнүн азыркы президенти Майя Сандунун кызматтан кетишин талап кылып, анын саясатына каршы оюн айтышкан. Нааразычылык акция тынч өтүп, полиция ишке аралашкан эмес.
Молдованын юстиция министри Сергей Литвиненко экс-президенттин үйүндөгү тинтүү боюнча пикирин билдирип, мекеме иликтөөнүн жүрүшүнө байкоо салып турарын билдирген. Ал мурдагы президентке карата иштин чоо-жайынан кабары жок экенин айтып, окуя мындан ары кандай өнүгөрүн билбей турганын кошумчалаган.
Белгилей кетсек, 2020-жылы мурдагы депутат Юрий Реницэ Додондун президент кезинде Демпартиянын лидери Владимир Плахотнюк жана анын орун басары Сергей Яралов менен жолуккан видеосун жарыялаган. Видеодо Додон Плахотнюктан баштык алган. Депутаттын айтымында, анын ичинде ири суммада акча болгон. Жолугушуу 2019-жылдын июнь айында болуп, бир нече күндөн кийин Плахотнюк өлкөдөн чыгып кеткен.
2020-жылы Коррупцияга каршы прокуратура кылмыштын белгилери аныкталбаганын айтып Додонго каршы кылмыш ишин козгоодон баш тарткан. Бул чечимди Кишиневду соту да колдогон. Бирок Апелляциялык палата соттун чечимин жокко чыгарган.
Плахотнюк — мурдагы депутат, Молдовадагы эң бай адамдардын бири. Ал акча алып, мыйзамсыз байып, банк системасынан миллиард долларды чыгарып кеткен деп айыпталып келет. Прокуратура аны өлкөгө экстрадициялоону талап кылууда.