Республикада 13 миң адам протездик-ортопедиялык буюмдарды алууга каттоого алынса, алардын 6 миңи балдар. Бул тууралуу Асылбек Сманов Sputnik Кыргызстан радиосунда маек куруп жатып билдирди.
Анын айтымында, Республикалык протездик-ортопедиялык буюмдар ишканасы майыптыгы бар жарандарга протездерди акысыз жасап берет.
"Республикалык протездик-ортопедиялык буюмдар ишканасынын негизги максаты элди протездик-ортопедиялык буюмдар менен камсыздоо болуп эсептелет. Мындан тышкары, ден соолугунан мүмкүнчүлүгү чектелген адамдарды жана таяныч-кыймыл аппараты бузулуп, жабыркаган жарандарды реабилитациянын техникалык каражаттары жана тиричилик шаймандары менен камсыздоого багытталат. Учурда өлкөдө 13 миң адам протездик-ортопедиялык буюмдарды алууга каттоого алынса, алардын 6 миңи балдар. Алардын көбү автокырсыктардан, өндүрүштөн жабыркагандар",— деди Сманов.
Ошондой эле адис жылдан-жылга протездик-ортопедиялык буюмдарга муктаж жарандардын саны көбөйүп жатканын кошумчалады.