БИШКЕК, 18-май — Sputnik. Парламенттин жыйынында депутаттар Марлен Маматалиев менен Султанбай Айжигитов кайым айтышты.
Айжигитов алтын казган компаниялардын кирешесинин кеминде 30 пайыздык үлүшүн милдеттүү түрдө мамлекетке алуу мыйзам долбооруна каршы чыкты. Ал мамлекеттин үлүшүн 70 пайыздан кем кылбаш керек деп эсептейт.
Демилгенин автору Маматалиев мында кеминде 30 пайыз деп белгиленгенин, аукционго коюлганда мамлекеттин үлүшү андан да жогору бааланышы мүмкүндүгүн белгиледи.
"Буга чейин лицензияны 300-1000 сомго сатып келишкен. Ошол жерде иштеп жүргөндө сиз эмнеге унчукпай отургансыз?" — деп суроо салды кесиптешине.
Айгижитов ошондой болгон чакта деле мыйзам жең ичинен сүйлөшүү талаасы болуп каларын айтты.
"Жаш саясатчылардын ушундай позициясын укканда Кыргызстандын келечегине күмөн жаралат. Булар келечектеги премьер-министр, президент. Ошондуктан "давайте"...", — деди эле Маматалиев "давайте" дебей сүйлөңүз" деп кайрылды.
Анда Айжигитов улууларды сыйлап, каяша сүйлөбөшүн талап кылды. Маматалиев "ансыз да буга чейин жаш курагыңызды сыйлап келгенбиз, туура сүйлөсөңүз!" деп жооп кайтарды.
Аны менен катар Айжигитов демилгечилерди коррупцияга жол ачып жатат деп айыптады.
Ошол учурда вице-спикер Нурбек Сыдыгалиев эки депутаттын тең микрофонун өчүрүп, орундарына отурууга чакырды.