БИШКЕК, 16-май. — Sputnik. Суусамыр дарыясына агып кеткен айылдык кеңештин депутаты Бакир Исаковдун сөөгү табылды. Бул туурасында ӨКМдин маалымат кызматы билдирди.
Издөө иштерине 40 куткаруучу жана беш суучул тартылган. Натыйжада бүгүн, 16-майда, саат 8:30да Бишкек — Ош унаа жолунун 160-165 чакырымындагы суунун жээгинен (Жайыл району) сөөгү табылган.
Айылдык кеңештин депутаты мындан беш күн мурун, 11-майда, дарыяга агып кеткени кабарланган. ӨКМдин маалыматына ылайык, Исаков алгач Суусамыр дарыясынын аралчасында калган атын чыгарып берүүнү өтүнүп ӨКМге кайрылган. Куткаруучулар суу кирип турганын, түшүү кооптуу экенин эскертишкен. Ага карабай сууга кирип, жылкысын алып чыгууну талап кылган.
"Саат 11:00дөр чамасында бир нече жолу эскертүү берилгенине карабай Бакир Исаков кайык менен өз алдынча сууга кирүүгө аракет кылганда куткаруучу кайыкка түшкөн. Кайык суунун катуу агымына туруштук бере албай оодарылып кеткен. Жаранды сактап калууга куткаруучулар аракет кылышкан. Тилекке каршы, суунун агымы өтө күчтүү болгондуктан куткаруучу жээкке сүзүп чыгууга аргасыз болгон. Ал эми Исаков дарыядан сүзүп чыга албай калган", — деп билдирди ӨКМ.
Кырсык болор замат куткаруучулар тартылганы менен натыйжа болгон эмес. Беш күндүк издөөдөн кийин сөөгүн табышканы айтылды.