БИШКЕК, 16-май — Sputnik. Батыш бир полярдуу дүйнө системасы артта калып бара жатканына албууттанып, аны кармап калуу үчүн айыгышкан күрөш жүргүзүп жатат. Бул тууралуу Москвадагы ЖККУ саммити учурунда Беларусь президенти Александр Лукашенко айтты.
"Биздин жолугушуубуз оор мезгилде, дүйнө кайра түзүлчү учурда өткөрүлүп жатат. Батыш бир полярдуу дүйнө системасы артта калып бара жатканын кабыл алгысы келген жок. Андыктан альянс өзүнүн курамына мурда бейтарап болгон мамлекеттерди тартып жатат. Кыскасы, учурда альянс "ким биз менен болбосо, ал — бизге душман" принцибин карманууда", — деди Лукашенко.
Ошондой эле ал акыркы эки жылдан бери Украина тараптан душмандык аракеттерди сезе баштаганын айтты.
"Украинага улутчулдарды, нацизмди, фашизмди, курал-жаракты шыкап жатып бизге каршы тукуруп коюшту. 2020-жылдын августунда Беларуста өткөн президенттик шайлоодон кийин Украина өзгөрдү. Түштүк жактагы коңшубуздан достукка жатпаган аракеттерди сезип жатабыз", — деди президент.
Мындан тышкары, Лукашенко Батыш Украинадагы жаңжалды дагы бир топ убакыт созууга кызыкдар экенин кошумчалады.
Сөзүнүн соңунда ал ЖККУну чыңдоо үчүн саясий кызматташууну күчөтүү, бирдей позицияны кармануу керектигин айтты.