БИШКЕК, 12-май — Sputnik. Токтогул Сатылганов атындагы Кыргыз улуттук филармониясынын жамааты Ысык-Көлдө "Улуттук филармония ыр-күү сунат жалпыга, касиеттүү Ысык-Көлдүн калкына!" аттуу чоң программадагы концерт берет. Бул тууралуу маданий мекеменин маалымат кызматы кабарлады.
Билдирмеге караганда, маданий иш-чара "Каракол шаары — КМШ өлкөлөрүнүн маданий борбору" деп жарыяланышына жана улуттук филармониянын 85 жылдыгына карата уюштурулмакчы.
"Анда Карамолдо Орозов атындагы мамлекеттик академиялык эл аспаптар оркестри, Чалагыз Исабаев атындагы "Камбаркан" фольклордук-этнографиялык ансамбли, Нурдин Түгөлов атындагы мамлекеттик "Ак-Марал" бий ансамбли жана улуттук филармониянын эл артисттери, эмгек сиңирген артисттери өнөрлөрүн тартуулайт", — деп айтылат маалыматта.
Концерт 17-18-майда Касымалы Жантөшев атындагы Ысык-Көл облустук драма театрында болору кошумчаланды.