БИШКЕК, 12-май — Sputnik. Балдарым өзүмдөй болуп Токмок шаарында өспөгөнүнө ичим ачышат. Бул тууралуу россиялык профессионал боксчу Дмитрий Бивол Sputnik Кыргызстан агенттигине берген эксклюзивдүү маеги учурунда айтты.
Журналист андан "Кыргызстандын жүрөгүңүздө орду кандай?" деген суроо берген.
"Мен балдарымдын мен өскөн жерде өспөгөнүнө ичим ачышат. Анткени мен Кыргызстанды дайыма жылуу сезимдер менен эстейм. Машыгууга көбүнчө өзүм эле велосипед менен кетип калчумун. Азыр Санкт-Петербургда бирөө баласын машыгууга өзүн жалгыз жибереби? Кыскасы, балалыгым сонун жерде өттү", — деди спортчу.
Ошондой эле Бивол Кыргызстанда жер-жемиштер өзгөчө даамдуу экенин кошумчалады.
"Кыргызстанда жер-жемиштер дагы өзгөчө даамдуу эле. Эсимде, короодо отурганда ат араба менен толтура помидор жүктөп алып сатып келишчү. Анын даамын, жытын айта көрбөгүлө. Кийин Санкт-Петербургга көчүп келгенде супсак помидорлорду жеп алып, ушунча да даамсыз болобу деп таң калгам", — деди ал.
Мындан тышкары, боксчу Токмок шаары спорттогу мүнөзүнүн калыптануусуна чоң таасир эткенин айтты.
"Мен Токмок шаарында туулуп, ошол жакта окуп, машыгып, ошол учурдагы адамдарды кезиктирбесем, азыркыдай киши болбосом керек эле", — деди Бивол.
Дмитрий Бивол 1990-жылы 18-декабрда Чүй облусунун Токмок шаарында туулган. Учурда Россиянын атынан чыгып жүрөт. Ал рингде жеңилип көргөн эмес. 20 кармаштын 11ин нокаут менен уткан жана WBA уюмунун супер чемпиону.
Бивол 8-май күнү Лас-Вегаста Канело каймана аты менен таанымал мексикалык айтылуу спортчу Сауль Альварести утуп, жарым оор салмакта чемпиондук наамын ийгиликтүү коргоду.