БИШКЕК, 12-май — Sputnik. Кыргызгидромет аптанын акыркы эки күнүнө карата аба ырайынын божомолу тууралуу маалымат берди.
Билдирмеге караганда, өлкөнүн көпчүлүк аймактарында күн күркүрөп, жамгыр жаашы ыктымал. Бишкекте да жаан-чачын күтүлөт.
Чүй, Талас облустары
14-майда эки облустун көпчүлүк аймактарында жаан жаап, күн күркүрөшү, бийик тоолуу райондордо кар жаашы, кээ бир райондордо жаан-чачын катуу жаашы ыктымал. 15-майда түнкүсүн көпчүлүк аймактарда, күндүз кээ бир райондордо жамгыр жаашы күтүлүүдө. Абанын температурасы Чүйдө 22...24 градус болсо, Таласта 20...22 градусту көрсөтөрү айтылды.
Ош, Жалал-Абад, Баткен облустары
Түштүк аймактарда да апта аягы жаанчыл болот. 14-майда кээ бир жерлерге жаан катуу жаашы мүмкүн. Тоолуу аймактарга кар түшүүсү божомолдонду. Абанын температурасы 23...25 градустун тегерегинде болот.
Нарын, Ысык-Көл облустары
Ысык-Көл жана Нарын облустарынын көпчүлүк аймактарында күн күркүрөп, жаан жаашы ыктымал. Абанын температурасы күндүз 14...19 градус, Нарында 17...19 градус болору божомолдонду.