Быйыл республика боюнча 9-классты 106 миң 299, ал эми 11-классты 67 миң 45 окуучу аяктап жатат. Бул тууралуу Салтанат Өмүрканова Sputnik Кыргызстан радиосунда маек куруп жатып билдирди.
Анын айтымында, бул жылы бүтүрүүчүлөргө аттестаттар 1-8-июлга чейин тапшырылат.
"Акыркы коңгуроо салтанаты быйыл мектептерде 2-3 саатка созулган программанын алкагында гана өткөрүлөт. Майрамдык линейка, концерттик программа менен коштолуп, күндүз уюштурулат. Ал эми бүтүрүү кечелерин өткөрүп, мектептен сырткары кандайдыр бир шаан-шөкөт уюштурган мектеп администрациялары жазаланат. Окуучулардын коопсуздугу үчүн мындай оюн-зоокторго ата-энелер да жол бербеши керек. Тескерисинче, балдарга түшүндүрүп, биринчи кезекте анын коопсуздук маселеси, экинчиден ысырапкорчулукка жол бербөөгө чакырганы дурус. Эгер болбой эле мектеп администрациясынын катышуусунда кафе, ресторандарда же ушул сыяктуу форматта өткөрүлгөн кечелерге күбө болсоңуздар 0 (312) 66 10 46; 0 (312) 66 34 07 номерлерине чалыңыздар. Мындай учурлар тууралуу алдын ала маалымат келип түшсө биз мектеп жамааты, ата-энелер комитети жана окуучулар менен иш алып барабыз", — деди Өмүрканова.
Ал быйыл акыркы сабактар 8-июнда өтүлөрүн кошумчалады.