БИШКЕК, 11-май — Sputnik. АКШ Россиянын аймагында масштабдуу согуш ачууга даярданган, бирок Москва аны алдын алууга жетишти. Бул тууралуу Плеханов атындагы Россия экономикалык университетинин саясат таануу жана социология кафедрасынын жетекчиси Андрей Кошкин Sputnik радиосуна курган маегинде билдирди.
Адис РФ президенти Владимир Путиндин 9-майда Жеңиш парадында айткан кебине комментарий берген. Путин анда Донбасста Россиянын тарыхый жерлерине, анын ичинде Крымга кол салууга ачыктан-ачык даярдык жүргөнүн билдирген. Ошондой эле НАТО Россияга жакын аймактарды аскердик жактан өздөштүрүп, өлкө коопсуздугуна коркунуч жаралганын белгилеп, РФ өз убагында чара көрүүгө аргасыз болгонун кошумчалаган.
Кошкин Sputnik радиосуна курган маегинде Россия Донбасс маселесин тынчтык жолу менен чечүү үчүн болгон мүмкүнчүлүктү колдонгонун айтты.
"Россияга мындай мүмкүнчүлүк берилген жок. Мындан улам ушундай кадамга барды. Окуяга эң катаал сот — убакыт гана баа бере алат. Америка Кошмо Штаттары өзүнүн прокси-аскерлерин Украинанын куралдуу күчтөрү катары көрсөтүп, Россиянын аймагына кол салууга даярданган. Так ушул себептен улам 2021-жылдын соңунда Россия Федерациясы Украинага кол салат деген маалыматтык-пропагандалык саясатты жүргүзө башташкан", — деди Кошкин.
Ал ошондой эле 24-февраль күнү Россияга каршы дароо киргизилген санкциянын төрт пакети дагы буга далил экенин белгиледи.
"Тагыраагы, мындай олуттуу чектөөлөрдү тез эле даярдап коюу мүмкүн эмес. АКШ Россиянын аймагында масштабдуу согуш ачууга даярданган, бирок Москва аны алдын алууга жетишти", — деди эксперт.