БИШКЕК, 9-май — Sputnik. Улуу Ата Мекендик согуштагы Жеңиштин 77 жылдыгына карата "Баатыр баяны" тасмасынын бет ачары болот. Бул тууралуу Маданият, маалымат, спорт жана жаштар саясаты министрлиги кабарлады.
Ага ылайык, Советтер Союзунун Баатыры Тукубай Тайгараевдин эрдиги тууралуу тартылган көркөм тасма 9-май күнү саат 14:00дө Улуттук тарых музейинде көрсөтүлөт.
"1941-1945-жылдары Улуу Ата Мекендик согушта мекенин коргоп, кайра келбей калгандардан 75 жоокер Советтер Союзунун Баатыры наамын алган. Алардын бири унутта калган Тукубай Тайгараев. Ал 1944-жылы Латвиянын Лузда шаарынын жанында чалгындоо тобу менен душмандардын координаттарын артиллериялык полкко берип, аларды толугу менен талкалоого көмөк көрсөткөн. Бирок чалгындоо тобу менен буктурмага кабылып, Тайгараев акыркы гранатасын жардырып, тегерегиндеги душмандар менен кошо курман болгон. Көрсөткөн эрдиги үчүн 1945-жылы март айында Советтер Союзунун Баатыры наамы ыйгарылган", — деп жазылат маалыматта.
"Баатыр баяны" көркөм-даректүү тасмасы СССР маршалы Андрей Еременконун "Годы возмездия" повестинин негизинде тартылганы айтылды.
Улуу Ата Мекендик согуштагы Жеңиштин 77 жылдыгына арналган "Өлбөс полк" акциясынын жүрүшүн Sputnik Кыргызстандын онлайн-репортажынан көрүүгө болот.