Эстебес байкенин эс-тутуму абдан күчтүү болчу. Бир угуп жаттап калган куйма кулак киши эле. Бул тууралуу Келдибек Ниязов Sputnik Кыргызстан радиосунда маек куруп жатып айтып берди.
Эстебес Турсуналиев Кыргыз ССРинин эл артисти Алымкул Үсөнбаевге шакирт болуп барып, анын үйүндө өз баласындай тарбияланган.
"Эстебес Турсуналиев төкмө акын эле эмес, апыртма жанрын да укмуш айткан киши болчу. Комузда кол ойнотуп, эргип чертчү, дикциясынын тактыгы боюнча да алдына киши салчу эмес. Анын эс-тутумунун күчтүүлүгүн маданият өкүлдөрү ушул күнгө чейин легенда кылып айтып жүрүшөт. Анан да абдан таза, тыкан киши эле. Устаты Алымкул Үсөнбаев да ушундай дене боюн тыкан алып жүргөн, интеллигент киши болгон экен. Жакын досу Төрөбай Кулатов экөө Эстебес байкени өз баласындай көрүп, өнөрдү эле үйрөтпөстөн, жүрүм-турум маданиятын боюна сиңирип берип, мээрим менен чоңойтушуптур. Турсуналиевди ошол кездеги президент Аскар Акаев Казакстан президенти Нурсултан Назарбаевге куда болуп, ачуу басарга ээрчитип барат. Назарбаев өзү домбураны колго алып, байбичеси опералык романстарды аткарып, кыздары скрипка, рояль чертип кыргызстандык кудалардын жарпын жазышат. Кезек Акаевдердин үй-бүлөсүнө келгенде алар вальс бийлеп беришет. Биздикилердин жообуна анчейин канааттанбай калган Чыңгыз Айтматов Эстебес Турсуналиевдин сахнага чыгышын өтүнөт. Ошондо Эстекем Назарбаевден домбураны сурап алып, казактын эски өлөңдөрүн ырдап берет. Абдан таң калган казак президенти чапан жаап, төкмөнүн 80 жылдык мааракесин Казакстандын 16 шаарында өткөрүүгө сөз берген экен", — деди Ниязов.
Ал Эстебес Турсуналиев Чыңгыз Айтматовдун да жакын сырдашы болгонун кошумчалады.