БИШКЕК, 5-май — Sputnik. Кичи футбол боюнча "Мурас" турниринин алкагында "Президенттик администрация" "Алга" командасын 4:0 эсеби менен утуп алды.
Аталган топтун баарын каршылашынын дарбазасына президент Садыр Жапаров киргизди. Алгачкы эсеп биринчи таймдын 13-мүнөтүндө ачылды. Ошол бойдон дарбазага топ кирбей кызуу таймаш болду. "Президенттик администрация" оюндун экинчи бөлүгү бүтөрүнө 1 мүнөт 41 секунд калганда тайм-аут алып, эс алууга чыкты. Кайра келери менен Жапаров дароо бир гол, анын артынан катары менен дагы эки гол киргизди. Натыйжада мамлекет башчынын 1,40 мүнөттө киргизген үч голу менен 4:0 эсебинде "Президенттик администрация" финалга чыкты. Атаандашы "Алга" командасы жеңилип калды.
Эми "Жогорку Кеңеш" менен "Ыйман" командаларынын беттешинде ким жеңсе, алар менен биринчи орун үчүн ойнойт.