БИШКЕК, 5-май — Sputnik. Лондон баалуу металлдар рыногунун ассоциациясы (LBMA) "Кыргыз алтын" ачык акционердик коомунун аффинаждык заводунун Good delivery статусун калыбына келтирди. Бул тууралуу министрлер кабинетинин маалымат кызматы кабарлады.
Муну менен "Кыргыз алтын" дүйнөдөгү ишенимдүү компаниялардын катарына кайрадан кошулганын айтты. Өкмөт башчы Акылбек Жапаров улуттук ишкана мындан ары да LBMA уюмундагы бардык милдеттенмелерин толук аткарат деген ишенимин билдирген.
"Министрлер кабинети LBMAнын Good delivery статусун калыбына келтирүү чечимин кубаттайт жана жогору баалайт. Бул чечим оңой болгон жок. "Кыргыз алтын" ААКсы акыркы жылдагы эң ири алтын өндүрүүчү ишкананын кожоюну алмашкан окуяларда көптөгөн сыноолорго чыдап, текшерүү процедурасынан татыктуу өтүшү керек эле. Биз дүйнөлүк рынокко алтын жана күмүштү ишенимдүү жеткирүүчү катары LBMA алкагындагы өз мойнубузга алган милдеттенмелерибизге бекем берилгендигибизди далилдей алдык", — деген Жапаров.
Ошондой эле ал кыргыз алтынынын дүйнөлүк рынокко толук кандуу чыгуусун калыбына келтирүү тууралуу кабыл алынган чечим Кыргызстандын азыркы президентинин командасынын адилет саясатын дагы бир жолу таануу болуп саналарын кошумчалаган.
"Биз элибиздин кызыкчылыгы үчүн жеңишке жетишүү менен гана чектелбестен, аны биринчи күндөн тартып эле убада кылгандай бардык эл аралык жана укуктук милдеттенмелерди толук сактоо менен аткара алдык", — деди өкмөт башчы.
Эске салсак, Лондондогу Баалуу металлдар рыногунун ассоциациясы (LBMA) "Кыргыз алтын" ишканасын ишенимдүү жеткирүүчү компаниялардын тизмесинен былтыркы жылдын сентябрь айында чыгарып салган. Анда "Кыргыз алтынга" ири каражатты мыйзамсыз чыгаруу аракети, Кумтөр кенинин активдерин мыйзамсыз басып алуу боюнча айыптар коюлган.
Ал эми быйыл 4-апрелде президент Садыр Жапаров Кумтөр кени толугу менен Кыргызстандын карамагына өткөнүн, канадалык компания менен бардык маселелер чечилгенин жар салган.