Фабриканы ишке киргизүүгө болжол менен 13,5 миллион доллар сарпталган. Анын 9 миллиондон ашыгыраак суммасын негиздөөчүлөр өзүнүн чөнтөгүнөн коротуп, калганын Россия-Кыргыз өнүктүрүү фондунан алышкан.
Аталган фонддун жетекчиси Артём Новиков бул ишкананы колдоо үчүн 3,5 миллион доллар бөлүнгөнүн билдирди.
"Ишканада биздин 250 жаран эмгектенет. Келечекте бул завод Кыргызстандын тоок этине болгон керектөөсүнүн 30 пайызын жабышы керек. Азыр биз жеп жаткан тоок этинин 97 пайызга жакыны чет өлкөдөн алып келинет. Кептин баары ушунда болуп жатпайбы. Мындан сырткары, РКӨФ колдоосу менен ушуга окшош дагы бир өндүрүш ачуу пландалууда. Демек, биз дагы жумуш орундарын түзүп, сапаттуу продукция өндүрүп жана азык-түлүк коопсуздугун камсыздайбыз", — деди Новиков.
Тоок фабрикасынын башкы директорунун орун басары Мурат Өзбеков заводдун жакынкы аралыктагы негизги максаты тоок этин өндүрүүнү көбөйтүү экенин айтты.
"Биздин продукцияларды учурда Балыкчыдан жана Бишкектеги эки дүкөндөн сатып алса болот. Эл продукцияга көнгөнгө чейин аз-аздан эле чыгарып жатабыз. Биз тоок этин өндүрүүнү көбөйтүү планын койгонбуз, чынында бул биздин рыноктун талабы", — деди Өзбеков.
Ишкананын артыкчылык жактары көп, муну менен бир гана жумуш орундары түзүлбөстөн, азык-түлүк коопсуздугу да камсыздалат.
Тема боюнча: