БИШКЕК, 29-апр. — Sputnik. Кыргызстанда социалдык жаатта эмгектенген кызматкерлердин, айрыкча мугалимдер менен билим берүү системасындагылардын эмгек акысы жогорулады.
Буга чейин айлык көтөрүлөрүн финансы министри Алмаз Бакетаев жарыялаган болчу. Ал апрель айынан тарта педагогдордун, дарыгерлердин, социалдык жана маданият кызматкерлердин айлыгы 50-100 пайызга жогорулай турганын белгилеген. Баары биригип 309 миңдей адам болгон.
"Билим берүү тармагындагы айлык маяна 80 пайызга өсөт. Эгер жаңы модель менен эсептей турган болсок, окууну жаңы бүтүп келген стажы жок мугалимдер колуна 20-21 миң сом алышат. Учурда бул сумма 4-7 миң сомду түзүүдө", — деп билдирген Бакетаев ошол кезде.
Бүгүн соцтармактын айрым колдонуучулары тууган-тааныштарынын айлыгы өскөнүн айтып сүйүнчүлөшүүдө.
Ош облусуна караштуу Талдык айылында иштеген мугалим Sputnik агенттигинин кабарчысына мурда 22-25 миң сом алып келсе, эми маяна катары 48 миң сом түшкөнүн билдирди.
"Кубанычыбызда чек жок. Менин айлыгым 100 пайыздан ашык көтөрүлдү окшойт. Буга чейин 22-25 миң сом алчумун, эми болсо 47 865 сом түштү. Биз тоолуу аймакта жашайбыз, бул дагы таасир этсе керек", — деди мугалим.
Жогорку Кеңештин депутаты Балбак Түлөбаев анын кичүү карындашы канча айлык алганын соцтармактагы баракчасына жазды.
"Жакшы кабар. Айылдагы карындашым 35 миң сом айлык алыптыр. Меники менен тең экен. Ылайым дагы көбөйсүн", — деди Түлөбаев.
Дагы бир интернет колдонуучу мугалим тууганынын айлыгы боюнча жазды.
"Айылда мугалим болуп иштеген бөлөм 14 миң сом айлык алчу эле, эми колуна 26 500 сом нак тийиптир", — деди Атай Бейшенбек.
Ал эми Назгүл Насиева социалдык жаатта эмгектенип келген тааныштарынын кубанычы менен бөлүштү.
"Бүгүн социалдык сферада иштегендердин кубанычында чек жок. Анткени айлыктары 100 пайызга көтөрүлүп, биринчи жолу түшкө кирбегендей каражат алып отурушат. Эң аз дегенде 18 000 — 20 000 сом, эң көп дегенде 40 000 сомдун тегерегинде алышыптыр", — деди ал.