БИШКЕК, 27-апр. — Sputnik. Жогорку Кеңештин депутаты Марлен Маматалиев жаңылыш сүйлөп алганын айтып, кесиптештери Балбак Түлөбаев менен Акылбек Түмөнбаевден кечирим сурады.
Белгилей кетсек, кечээ тармактык комитетте парламенттин жаңы регламенти талкууланып, Маматалиев баяндама жасаган. Анда ал Түлөбаев регламентке ЖК депутаттарын Конституцияны өзгөртүү, министрлер кабинетинин республикалык бюджеттин аткарылышы тууралуу отчётун угуу укугунан ажыратууну сунуштаганын маалымдаган. Кийинчерээк ал адашып алганын айтып, демилгени Түлөбаев эмес, Түмөнбаев көтөргөнүн билдирген.
Ал эми бүгүн аталган эки депутат тең мындай сунуш бербегенин айтып чыкты.
"Регламенттин кыскартылган варианты 500 барактан турат, депутаттардан 40тан ашуун сунуш берилген. Кечээ төрт саат карадык, орозо убагында минтип иштөө кыйын экен. Кагазга кыскартып жазганда техникалык ката кетип калат экен. Бул жакта иштеген ЖК комитетинин бөлүмүнүн жана автор катары өзүмдүн атымдан эки абамдан кечирим сурайм. Бирок ошол эле учурда ички маселелерди башка жагдайга буруп кетпешибиз керек", — деди Маматалиев.
Андан соң депутат Sputnik Кыргызстандын кабарчысына комментарий берип, сунуш боюнча түшүндүрдү.
"Түмөнбаевден депутаттык топ болсун деп гана келген. Балбак Зарлыкович "Министрлер кабинети мурдагыдай жалпы отчёт береби же бюджет боюнча эле угабызбы? Анын мөөнөттөрү кандай болот?" деген суроолорун берип жатат. "Конституцияны өзгөрткөнгө биздин укугубуз барбы, ЖК ыйгарым укуктарынан аша чаап кетпейби?" деп да сураган. Ал өкмөттү көзөмөлдөбөй, отчётун укпай коёлу деген эмес", — деди эл өкүлү.
Маматалиев өзү жаңылыш сүйлөп алганын моюндап, эки депутаттын тең андай ниети жок болгонун белгиледи.
"Түмөнбаевдин сунушун кароого келгенде Балбак Зарлыковичтин кеңешчиси, катчылыктан кайра-кайра чалып атышты. Телефонду карасам "туура эмес айтып койдуңуз, Түлөбаев эмес, Түмөнбаев" деген билдирүү келиптир. Жанымда отурган бөлүмдүн жетекчилеринен "кимдин сунушу десем "Түмөнбаевдики" дешти. Ошол учурда Түмөнбаевдин сунушун карап жатканбыз. Анан дароо эле адашыптырмын Түлөбаев эмес, Түмөнбаев деп айтып алдым", — деди Маматалиев.
Жогорку Кеңештин жаңы регламентинин долбоору майдагы эс алуу күндөрүнөн кийин жалпы жыйынга чыгарылат.