БИШКЕК, 27-апр. — Sputnik. Кесиптик лицейлерге каржылык эркиндик берүү жана сапатын жакшыртууга багытталган мыйзам долбоору коомдук талкууга чыгарылды.
Демилгечилердин бири депутат Жанар Акаевдин айтымында, учурдагы укуктук актыларда лицейлер тапкан каражатын өнүгүүгө жумшай албайт.
"Бул мыйзам өтсө кесиптик-техникалык окуу жайлар өзү үчүн өзү иштеп баштайт, стимул пайда болот. Мамлекеттик бюджеттен каражат албай өздөрү материалдык-техникалык базасын жакшыртып, окуучулар үчүн жагымдуу шарттар түзүлөт. Региондордо ишкердиктин өсүшүнө шарт түзүлүп, жумуш орундары пайда болмок. Кесиптик лицейлер финансылык туруктуулукка жетишсе айыл жаштарын ишкерликке тарткан борбор болуп калмак. Мунун баары региондордун өнүгүшүнө түрткү берет", — деди Акаев.
Ошондой эле ал бүгүнкү күндө эмгек рыногу кызмат көрсөтүүчү кесиптерге муктаж болуп турганын белгилеген. Лицейлер кыска убакытта IT адиси, ширеткич, сантехник, тигүүчү, автомеханик, ашпозчу, чач-тарач сыяктуу эң керектүү кесиптик билимдерди берет. Бирок ал окуу жайлардын материалдык-техникалык базасы эскирген жана кесипкөй мугалимдер көп келе бербейт.
29-апрель күнү Жогорку Кеңеште аталган мыйзам долбооруна коомдук талкуу уюштурулуп жатат. Каалоочулар барып катышса болот.
Суроолор боюнча 0(312) 638527 номери же arturatakul@gmail.com электрондук дареги аркылуу кайрылуу сунушталат.