БИШКЕК, 25-апр. — Sputnik. Бишкекте 2013-жылы өз өлкөсүндө каржы пирамидасын түзүп, ири суммадагы акча каражатын алып кетүүгө шектелген Кытайдын 51 жаштагы жараны Чж.Ч. кармалды. Бул тууралуу ИИМдин маалымат кызматы кабарлады.
Шектүү 2014-жылдан бери Кыргызстанда мыйзамсыз жүргөн.
"Чж.Ч. аттуу киши 2013-жылдын март айында Пекиндеги компаниялардын бирин башкарып турганда алдоо жана каржы пирамидасын түзүү жолу менен 200 миллион юань суммасындагы депозитти алып чыгып, белгисиз тарапка качып кеткен", — деп жазылган маалыматта.
Бул факт боюнча чет өлкөлүккө Интерпол издөө жарыялаган.
Ал 19-апрель күнү ИИМдин Экстремизмге жана мыйзамсыз миграцияга каршы аракеттенүү кызматынын жана Интерпол улуттук борбордук бюросунун кызматкерлери тарабынан кармалган.
Учурда кытайлык киши №1 тергөө абагына бир айга камакка алынды. Башкы прокуратура аны өлкөсүнө экстрадициялоо маселесин карап жатат.