Бишкекте өтүп жаткан салттуу музыка жумалыгы быйыл 18инчи ирет уюштурулууда. Аны менен бирге IX эл аралык музыка, бий конгресси да кошулуп, быйылкы саамалык эл аралык алкакка чыкты. Иш-чаралардын максаты — салттуу музыканы даңазалоо, өркүндөтүп жайылтуу, коңшу жашаган элдер менен ынтымакты бекемдөө жана алардын салттуу музыкалык искусствосун таануу. Бул тууралуу Азиз Биймырза уулу Sputnik Кыргызстан радиосунда маек куруп жатып билдирди.
Анын айтымында, быйылкы салтуу музыка жумалыгы маданий жана илимий бөлүктөн турат.
"Былтыр 2021-жылы Баткен шаарында "Салттуу музыка жумалыгын" жана эл аралык "Достук" фестивалын өткөргөн элек. Ага Кыргызстан, Өзбекстан жана Тажикстандын көрүнүктүү маданият өкүлдөрү, салттуу музыканын дасыккан чеберлери жана жаш таланттар катышкан. Ал эми быйылкы саамалык эл аралык алкакка чыгып, IX эл аралык музыка, бий конгресси да кошулду. Андан сырткары, Күү күнү, Ыр күнү, Дастан күндөрү өтүп, күн сайын кечинде концерт уюштурулат. Жумалыкка Казакстан, Түркия, Өзбекстан, Азербайжан, Россиянын Алтай жана Тыва республикаларынын өкүлдөрү келишти. Ошондой эле Венгрия, Италия, Улуу Британия, Индия жана Бангладеш өлкөлөрүнүн өкүлдөрү илимий багытта өтө турган конгресске онлайн-форматта катышат. Кыргызстанга келген коноктор, кыргыз өнөрпоздору төкмө акын Замирбек Үсөнбаев менен комузчу Сааданбай Шабдановдун мастер-классын угуп, салттуу музыкалык искусствонун айтуучулук багыты боюнча "Манас" театрынын манасчы, дастанчы, акындарынын концертине күбө болушат. Ошону менен бирге Кыргыз улуттук академиялык драма театрында "Коркут Ата" спектакли көрсөтүлүп, окуу жайларда салттуу музыкалык искусствонун окутулушу боюнча тегерек столдор, музыкалык окуу жайлардын отчеттук концерти болору күтүлүүдө. Ар эки жыл сайын жумалык конкурс иретинде өткөрүлүп келген эле. Бул жылы салттуу маданияттагы кол өнөрчүлүктү даңазалоо аркылуу уста, чеберлерге дем берүү иретинде аспаптарды жасаган усталар арасында сынак өткөнү турат", — деди Биймырза уулу.
Жумалык 25-апрелде Токтогул Сатылганов атындагы Кыргыз улуттук филармониясында салттуу музыка чеберлеринин гала-концерти менен жыйынтыкталары кошумчаланды.