БИШКЕК, 16-апр. — Sputnik. Батыштын эбегейсиз санкцияларына карабастан Россиянын энергия ресурстарын сатуусу азайган жок, тескерисинче, өстү. Бул тууралуу Business Insider жазды.
Басылма АКШ, Улуу Британия жана Евробиримдик Россиянын энергия секторуна карата олуттуу чектөөлөрдү киргизгенин белгиледи.
"Бул кадамдарга карабастан учурда Россия чыр-чатакка чейинки мезгилден да көбүрөөк мунай жана газ сатууда", — деп жазган портал.
РФтин Финансы министрлигинин маалыматы боюнча, өкмөт апрелде энергия ресурстарын сатуудан 9,6 миллиард долларга жакын киреше күтүүдө. Ал эми Bloomberg басылмасынын божомолуна ылайык, быйыл Россия энергия каражаттарынын экспортунан 321 миллиард долларга жакын киреше табат, бул былтыркыга салыштырмалуу көп.
"Бул божомолдор Батыштын өткөн айда киргизген санкцияларына кайра карама-каршылык жаратат", — деп жазган басылма.
Энергия секторунда Россиянын каражатын сатып алчулар көп экени белгиленет.
Reuters агенттигинин маалыматында, атайын операция башталгандан бери Индия Россиядан мунайдын 13 миллион баррелин сатыл алган, былтыр өлкө бир жылда 16 миллион баррель алган эле. Мындан тышкары, Кытай мунай ташыган негизги мамлекеттердин катарында. Жадагалса Россиянын энергия каражаттарынан баш тартуунун жолун издеп жүргөн Евробиримдик сатып алууну улантууда.
Россиянын Украинаны демилитаризация жана денацификациялоо боюнча атайын операциясы башталгандан тарта Батыш Москвага санкция боюнча басымдарын катуулатты. Чектөө биринчи иретте банк системасы менен жогорку технологиялык продукцияларды ташып келүү жолдоруна коюлду. Бирок мунун баары Батыш өлкөлөрү үчүн экономикалык көйгөйлөрдү жаратты.