БИШКЕК, 10-апр. — Sputnik. Кыргызгидромет агенттиги алдыдагы аптага карата аба ырайы тууралуу маалымат берди.
Ага ылайык, Бишкек шаарында бул жумада күн ачык болуп, жаан-чачын күтүлбөйт.
Чүй облусу
10-апрелде түнкүсүн көпчүлүк аймактарда, күндүз кээ бир райондордо жамгыр жаайт.
11-апрелде күн ачылып, бирок 12-апрелде тоолуу райондордо кар жаашы ыктымал. Дыйканчылык аймактарда жаан жаабайт.
Талас облусу
10-11-апрелде күн ачык болот, 12-13-апрелде тоолуу райондордо кар жаай турганы айтылды.
Ош, Жалал-Абад, Баткен облустары
10-апрелден 12сине чейин асман ачык турат, ал эми 13-апрелде күндүз тоолуу аймактарда кар жаашы күтүлөт, дыйканчылык жерлерде жаан жаабайт. Ошол бойдон 16-апрелге чейин күн ачык болот.
Бийик тоолуу райондордо жолдор тайгак болот. Түштүк-батыштан соккон шамалдын ылдамдыгы секундасына 4-9 метрге жетиши күтүлөт.
Ысык-Көл облусу
10-апрелде көпчүлүк аймактарда жаан, тоолуу райондордо кар жаашы күтүлөт. 11-12-апрелде кайра күн ачылат, бирок 13-апрелде күндүз тоолуу жерлерге кар түшөт. 14-15-апрелде кээ бир райондорго жамгыр жаайт. 16-апрелде жаан-чачын күтүлбөйт.
Нарын облусу
10-апрелде кээ бир райондордо жамгыр жаайт. 11-12-апрелде күндүн көзү ачылып, ал эми 13-апрелде бийик тоолорго кар жаашы ыктымал. 14-15-апрелде кээ бир райондордо жамгыр жаайт. 16-апрелде жаан-чачын токтойт.