БИШКЕК, 9-апр. — Sputnik. 11-апрелден тарта юридикалык жашаган жери боюнча балдарды 1-класска электрондук каттоо башталат.
Билим берүү министрлигинин маалыматында, электрондук каттоо системасы саат 9:00дө иштеп баштайт. Юридикалык жери боюнча каттоо бул ата-энеси мектеп жайгашкан микроучастоктордо катталгандарга тиешелүү. Биринчи этап 27-июнга чейин созулуп, 27-июндан 10-августка чейин экинчи этап уланат. Анда юридикалык каттоосу башка жактагы ата-энелер (факт боюнча катталгандар) балдарын 1-класска мектепке каттайт.
Баланы мектепке каттоо үчүн ата-эненин бир системага аты-жөнү, паспорттогу маалыматтарын жазып, ПИН номерин тергенде эле анын юридикалык катталган жери боюнча мектепти сунушталат. Ата-эне өзү жашаган жердеги эле мектепке бере алат. Эгер ага макул болбосо, экинчи этапты күтөт.
Белгилей кетсек, баланы 1-класска электрондук каттоо быйыл Кыргызстандын бардык аймактарында ишке ашат. Башкача айтканда, ата-энелер шаар, айылда жашаганына карабай баласын мектепке дал ушул система менен гана киргизе алат.
Электрондук каттоо боюнча кененирээк маалыматты Sputnik Кыргызстан агенттиги даярдаган материалдан окуй аласыздар.