Кыргызстанда залал шишиктен улам эмчеги кесилген учурда реконструкциялоо алгач ирет жасалганы турат. Бул тууралуу Кыял Макиева Sputnik Кыргызстан радиосунда маек куруп жатып билдирди.
Анын айтымында, аталган операция акысыз жүргүзүлөт.
"Адатта биздин аялдар рак өрчүп кеткенде, оору пайда болгондо гана дарыгерге кайрылышат. Бул учурда көбүнесе дарылаганга кеч болуп калат. Андыктан ар бир аял жыл сайын маммологдон текшерүүдөн өтүп турса өз саламаттыгы үчүн жакшы болмок. Бирок ооруга чалдыгып калган учурда деле кол куушуруп отуруп калбайбыз. Биопсия аркылуу анализдерин алып, рактын түрүн аныктап алган соң ошого жараша дарылайбыз. Өтүшүп кеткен учурларда эмчекти толугу менен кесип салууга туура келет. Бул аялдарды олуттуу стресске кептеп, үй-бүлөлүк жашоосунун начарлаган учурлары да бар. Андыктан кайрадан чоюп же имплант салып реконструкциялап коюу керек. Ушул убакка чейин биз бул реконструкциялоо иштерин жасай алчу эмеспиз. Анткени шарт жок эле. Быйыл колго алганы турабыз. Зарыл болсо Онкологиялык улуттук борборго кайрылышса болот. Анын өзүнүн талаптары бар. Белгилүү убакыт сууга түшпөө, оор жумуш жасабоо, үч айда бир текшерилип туруу сунушталат", — деди Макиева.
Ал реконструкция жасатууну каалагандар үчүн ага чейин жана кийин аткарылчу талаптарды дарыгерлер түшүндүрүп берерин кошумчалады.