"Ушул бала бакча маселеси боюнча 2011-жылы Роза Отунбаева президент кезинде кайрылганбыз. Акыры аз гана каражат бөлүнүп, 2016-жылы фундаменти куюлган. Анан былтыр күздө биринчи этажынын дубалы тургузулган. Биздин айылдан депутат же министр чыкса эртерээк бүтсө керек деп ойлойм. Себеби азыр Кыргызстанда ушундай болуп жатпайбы. Ансыз да азыр мектеп программасы бала бакчадан кийинкиге ыңгайлаштырылган. Байкуш 1-класстын мугалимдери аябай кыйналышат. Себеби мурдагы программа менен азыркысы эки бөлөк", — деди Бакирова.
"Эгер быйыл дагы акча каражаты бөлүнбөй бала бакча ушул боюнча кала турган болсо, кышында дубалдары үшүк уруп кайра урай баштайт. Ошон үчүн быйылкыдан калтырбай бюджетке киргизип берсе эл үчүн жакшы болот эле. Айылыбыз бийик тоолуу жана жетүүгө кыйын зонада жайгашкан. Кыш беш-алты айга созулуп, катуу суук болот. Андыктан курулуш иштерин октябрга чейин гана жүргүзүү мүмкүн", — деди Султанбаева.