БИШКЕК, 7-апр. — Sputnik. Сүннөткө отургузгандан кийин чарчап калган жети жаштагы баланын ата-энеси милицияга арыз жазган эмес. Бул тууралуу Октябрь РИИБдин маалымат кызматы кабарлады.
"Аталган факты боюнча каза тапкан баланын ата-энеси арыз менен райондук милицияга кайрылган жок. Себебин эч кимге доосу жок экендиги менен түшүндүрүштү", — деп жазылган маалыматта.
Бишкекте 2-апрель күнү жети жашар бала сүннөткө отургузгандан кийин көз жумган. Алгач Улуттук госпиталда жергиликтүү наркоз менен процедура жасалып, бала Платтер синдромуна кабылып, кан көп кетип калганы кабарланган. Андан кийин Шаардык балдар клиникалык тез жардам ооруканасынын хирургия бөлүмүнө түшкөн. Кийинчерээк Саламаттык сактоо министрлиги наристе кансырап эмес, жүрөгү токтоп калгандыктан өмүрү менен кош айтышканын билдирген.
Милиция фактыны каттоого алып, соттук-медициналык экспертиза дайындаган болчу. Ошондой эле Саламаттык сактоо министрлиги Улуттук госпиталдын урология бөлүмүнүн жетекчиси Азиз Абдрасуловго сөгүш жарыялаган, ал эми сүннөткө отургузууну ишке ашырган дарыгер өз каалоосу менен иштен кеткен.