БИШКЕК, 6-апр. — Sputnik. Жооткоткон жана тынчтанууга жардам берген каражаттарды өз алдынча пайдалануу өтө кооптуу. Бул тууралуу Sputnik радиосуна психиатр-нарколог Василий Шуров айтып берди.
Дарыгер азыр тынчсызданууга кабылган бейтаптар мындай көйгөй менен жабыркаган башка адамдарга форумдар аркылуу кеңештерди берип, жооткотуучу дарылардан бери сунуштап жатканын айткан.
"Тилекке каршы, өздөрүнө депрессия, психологиялык бузулуу, стресс, уйкусуздук сыяктуу диагноздорду коюп алгандар көбөйдү. Анан интернеттен ар кайсыны окушат, форумдарда отурушат, бири-бирине ичкен, колдонгон каражаттарын сунушташат", — деген дарыгер.
Ал тынчтандыруучу каражаттарды медициналык билими жана тажрыйбасы бар адис жазып бериши керектигин айткан. Адатта психиатр алты жыл медициналык жалпы билим, андан кийин эки жыл адистиги боюнча окуп, анан бир канча убакыт иштегенден кийин психикалык абалга жана эмоцияга таасир эткен дарыларды жаза аларын белгилеген.
Дарыгер жооткотуучу каражаттарды медициналык көрсөтмөсү жок колдонуунун кыйыр таасирлерин эскертти.
"Тынчтандыруучу каражаттардын көбү көз карандылыкка алып келет. Дары таасир этпей калганда 2-3, кээде 4 таблеткадан ичүү керек болот. Айрым учурда ичкенди токтотуп койсо адам кайра мурдагы абалына кайтып, айла жок психотроптук каражаттарды колдонууну улантат. Жылдап препарат менен жүргөндөр бар. Натыйжада боор, бөйрөк жана нерв системасы жабыркайт", — деген Шуров.
Дарыгер көйгөйдү чечүү үчүн адистерге гана кайрылуу керектигин кайталады. Тынчсыздана берген адам психотерапевт менен жакшылап иштесе, дары-дармектен деле оолак болорун айтты.