БИШКЕК, 5-апр. — Sputnik. Ош шаарында эми тарыхый жана маданий эстеликтер туурасында QR-код аркылуу билип, маалымат алса болот. Бул туурасында мэриянын маалымат кызматынан кабарлашты.
Долбоор мэр Алмаз Мамбетовдун "Ош — Улуу Жибек Жолунун провайдери" программасынын алкагында ишке ашырылып жатканын айтышты.
"Долбоор жаштар арасында тарых жана маданиятты жайылтууга, Ош шаарында жана облуста туризм тармагын өнүктүрүүгө колдоо көрсөтүүгө багытталган. QR-кодду смартфон аркылуу сканерлегенде эстеликтер качан тургузулганын, ал адамдын өмүр таржымалын, тарыхка кандай салым кошконун, сүрөттөрүн дароо көрө аласыз", — деп айтылат маалыматта.
Аларды кыргыз, орус жана англис тилдеринде окууга болот.
Маалымат кызматы учурда Ош шаарындагы жана Ош облусундагы 20 объектинин жанына QR-код орнотулганын билдирди.