БИШКЕК, 5-апр. — Sputnik. "Газпром" ишканасы Германиянын "Реден" газ сактоочу ири жайына көгүлтүр от берүүнү токтотту. Бул тууралуу EurAsiaDaily басылмасы Gazprom Germania компаниясынын Astora операторуна таянып кабарлады.
Анын маалыматына караганда, 1-апрель күнү эртең менен "Реденде" сырьёго байланыштуу бардык операциялар токтотулган. Буга чейин аталган жай Германиянын газ транспорттук системасына көгүлтүр от берип келген. 4-апрелге карата анын активдүү запасы суткасына 21 миллион куб метрди түзгөн.
"Газпром" ишканасынын өкүлдөрү 31-мартта эле Gazprom Germania GmbH компаниясы менен анын активдерине катышууну токтоткон. Жакында Германиянын экономика министри Роберт Хабек компания 30-сентябрга чейин убактылуу Федералдык тармактык агенттигинин башкаруусуна өткөнүн билдирген. Ал "Газпром" тышкы соода боюнча мыйзамды бузуп, Германиянын өкмөтүнүн уруксаты жок эле бул мамлекеттин туунду компаниясынан чыкканын айткан.
Gazprom Germania GmbH буга чейин "Газпром экспорт" ишканасынын туунду мекемеси болуп келген. Компания күйүүчү май сатып, Германияда газ куйган станцияларынын түйүнү бар болчу. Gazprom Marketing & Trading, Wingas жана башка Германия, Улуу Британия, Швейцария, Чехиядагы бир нече компаниялар дал ушул ишкананын карамагында.