БИШКЕК, 31-мар. — Sputnik. Кыргызстанда энергетика тармагына тиешелүү бардык ишканалар бириктирилип, эки ири компанияга айланат. Бул тууралуу энергетика министри Доскул Бекмурзаев маалымат жыйын учурунда билдирди.
Анын айтымында, энергетиканы бөлүштүрүү боюнча иш алып барган ишканалар бир топко, ал эми "Кыргызстан улуттук электр тармагы", Бишкек жана Ош шаарларынын ТЭЦтери сыяктуу мекемелер экинчи топко кошулат.
"Мындан бир нече жыл мурда энергетика тармагында реформа кылабыз демиш болуп, компанияларды майдалап, бириндетишкен. Мындай жол менен ошол убакта тармакты алсыздандырып, бара-бара менчиктештирип алууну көздөшкөн. Учурда биз баарын бириктирип, кайра күчтөндүрөбүз. Көпчүлүк түзүмдөр чарбалык эсепке өтүп, мурдагыдай тарифтен көз каранды болбой, өз алдынча акча табууга үйрөнөт", — деди министр.
Ошондой эле ал учурда тармактын башында турган Улуттук энергетикалык холдингдин тагдыры кандай болорун айтты.
"Биз көздөп жаткан реформанын башында Улуттук энергетикалык холдинг туруп, иш аягына чыкканга чейин өз милдетин аткарат. Андан кийин гана анын тагдырын чечебиз. Балким, башкаларды кайталабагыдай функцияларды алып, бөлөк багытта иштеп калышы мүмкүн", — деди Бекмурзаев.
Мындан тышкары, министр ишканалар бириктирилгени менен аларда иштеген бир дагы кызматкер ишсиз калбасын кошумчалады.
Сөзүнүн соңунда ал ишканаларды реформалоо менен 1 миллиард сом үнөмдөөгө болорун билдирди.