БИШКЕК, 30-мар. — Sputnik. Жогорку Кеңештин депутаты Сеид Атамбаев атасы, мурдагы президент Алмазбек Атамбаевдин соңку иши боюнча депутаттык комиссия түзүп, иликтөөнү сунуштады.
Ал Жаза аткаруу кызматынын (ЖАК) жумушчулары Атамбаевди сотко күчкө салып алып кетишкенин белгиледи.
"Барып сүйлөшсөм чынында жаракат алыптыр. Ошону иликтеп чыксак жакшы болмок эле. Себеби Жаза аткаруу кызматы видео байкоого тартылган жазууларды бербей жатат. Маалымат кызматы "өз ыктыяры менен барып кийимин чечип, жаман сөздөр менен сүйлөгөн" деп тараткан билдирүүсү жалган. Депутаттык комиссия түзүп, ушуну иликтеп чыгышыбыз керек. Себеби бул жерде кызыкчылыктар кагылышы бар. ЖАК төрагасынын орун басары Рахатбек Жапаров өкмөт башчы Акылбек Жапаровдун иниси болуп жатат. Кудасы ким экенин өзүңүздөр билесиздер", — деди Атамбаев.
Ошондой эле ал кандай болсо да бул ишти аягына чыгара турганын айтты.
"Бир жумадан кийин аны башка түрмөгө которот. Өмүрүнө коркунуч бар. Айтып коёюн, Алмазбек Атамбаев эч качан өмүрүнө кол салбайт. Эгер башы жарылып же тамакка какап өлүп калса, мен түздөн-түз ушул бийлик кол көтөрдү деп эсептейм", — деди депутат.
Эске салсак, 23-март күнү жактоочу Замир Жоошев Атамбаевди абактан күч колдонуу менен Биринчи май райондук сотуна алып келгенин билдирген. Анын айтымында, № 47 колониянын кызматкерлери аны абактан футболка, ич кийимчен мажбурлап алып чыгып конвоирлерге өткөрүп берген. Эртеси Атамбаевдин тарапташтары ага жасалган мамилеге нааразы болуп түрмөнүн алдында митинг уюштурган.
Андан көп өтпөй Кыйноолорду алдын алуу борбору мурдагы Атамбаев аталган окуяга байланыштуу абакка барып, экс-президенттен кабар алган. Маектешүү учурунда Атамбаевдин буту-колу көгөргөнү аныкталганын билдирип, ал жана башка жагдайлар боюнча бир нече акт түзүшкөн. Белгиленген фактылар боюнча Кыйноолорду алдын алуу борбору тиешелүү органдарга кайрылуу жибере турганы айтылган. Андан сырткары акыйкатчынын өкүлдөрү да барган.
Атамбаевди сотко алып келгени боюнча ЖАК өзүнүн маалыматын тараткан. 25-мартта президент Садыр Жапаров да бул окуя тууралуу үн каткан.