БИШКЕК, 29-мар. — Sputnik. РФке жасалган антироссиялык санкциялардан улам болгон экономикалык басым Европада олуттуу экономикалык кризисти чакырып, ал Батыштын бөлүнүп-жарылышына алып келет. Бул туурасында Financial Times жазгандыгын РИА Новости билдирди.
Басылма Батыш өлкөлөрү Россияга карата "мурда болуп көрбөгөндөй" санкциялары аркылуу "өзүнүн тездиги жана биримдиги менен ал тургай өздөрүн да таңдантканын" жазды. Ал арада Москва менен "экономикалык ажырымдын" кесепети Европада эми катуу сезиле баштайт. Алар: баалардын көтөрүлүшү, электр кубатынын жетишсиздиги, жумушчу орундардын жок болушу жана украиналык качкындардын агымынан пайда болчу социалдык көйгөйлөр. Маселен, макаланын автору Улуу Британияда электр кубатынын эсептери апрелде 50 пайызга, ал эми октябрда дагы 50 пайызга өсөрүн эскертти.
Мындан сырткары, азык-түлүктүн кымбатташына аралжы боло турган ресурстары жок Жакынкы Чыгыш менен Африканы ачарчылык тез арада каптап, Европага жаңы качкындардын масштабдуу агымын жаратышы мүмкүндүгү айтылган.
"Батыш биримдиги экономикалык басымдардын арбышынан улам ажырымга учурашы мүмкүн, бул саясий лидерлерге ар тараптан басым жасалышына алып келет", — деп жазат басылма.
Макаланын авторунун пикирине караганда, Батыш өлкөлөрүнүн өкмөттөрүнүн ортосунда эмитен эле чыңалуунун "чети көрүнө баштады".
Россия Украинадагы операцияны 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" экендигин айткан. Бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип жоопкерчиликке тартуу пландалып жаткандыгын белгилеген. Россиянын Коргоо министрлиги куралдуу күчтөр соккуну Украина тараптын аскердик инфраструктуралары менен күч түзүмдөрүнө уруп жаткандыгын, жай жарандарга багытталбагандыгын билдирген.
Россия президенти анын мамлекетинин Куралдуу күчтөрү Луганск, Донецк республикаларын колдоп, аларга ыдык көрсөтүп жаткан топторго чабуул коюлуп жаткандыгын, бирок Украинаны басып алуу туурасында кеп болбогондугун билдирген эле.
Батыш өлкөлөрү жана аларга тиешелүү улуттар аралык компаниялар Россияга каршы бир топ чектөөлөрдү киргизген.
Ал тургай айрым өлкөлөр Россиянын учактары үчүн аба мейкиндигин жаап, учурда каттамдар токтотулган. Ошондой эле Россиянын аймагында иш алып барган дүйнөлүк ири бренддер ишин токтотуп койгон.
Ошол эле учурда серепчилер Батыш россиялык сырьёдон баш тартса өздөрү бир топ зыянга учураарын айтып келишет.
РФ лидеринин маалымат катчысы Дмитрий Песков Батыштын санкциялары бир топ олуттуу экендигин, бирок Россия ага алдын ала чараларды көрүп, камдангандыгын билдирген.
РФ ТИМ жетекчиси Россия менен иштешүүдөн баш тарткан компаниялар бул кадамга аларга басым кылынгандан кийин баргандыгын, бирок Москва Батыш жараткан бардык экономикалык көйгөйлөрдү чечерин айткан.
Жаңылыктарды кыска жана ыкчам окугуңуз келсе Telegram каналыбызга катталыңыз.