БИШКЕК, 29-мар. — Sputnik. Бишкекте Audi үлгүсүндөгү автоунаа аялдамада тургандарды сүзүп, үч адам жабыркады. Бул тууралуу Кайгуул милициясынын маалымат катчысы Байказы Айтикул уулу кабарлады.
Анын айтымында, жол кырсыгы бүгүн, 29-мартта, саат 10:00дөр чамасында Чыгыш-5 кичи районунда болгон.
"Audi үлгүсүндөгү автоунаанын айдоочусу Чүй проспекти менен күн чыгышты көздөй бара жатып Чыгыш-5 кичи районуна келгенде машинасын башкара албай, аялдамада турган үч кишини сүзгөн. Кырсыктан эне-бала жана дагы бир киши жабыркаган", — деди Байказы уулу.
Ал жерине Тез жардам кызматы чакырылганын айтып, учурда укук коргоо кызматкерлери иштеп жатканын кошумчалады.
Жаңылыктарды кыска жана ыкчам окугуңуз келсе Telegram каналыбызга катталыңыз.