БИШКЕК, 29-мар. — Sputnik. Алмазбек Атамбаевдин адвокаты Замир Жоошев мурдагы президенттин медициналык кароодон өтүүдөн баш тартканы боюнча комментарий берди.
"Кечээ Алмазбек Атамбаевдин медициналык кароодон өтүүдөн баш тартышына эл көзүнчө жасалышын каалабаганы себеп болду деп эсептейм. Жүрөк оорусу абакта эмес, шарты бар жеке менчик же мамлекеттик кардиоборбордо каралышы зарыл. Атамбаевдин инфаркт алып өлүп калышын каалашпаса толук кандуу текшерүүдөн өткөрүш керек. 23-март күнү №47 колонияда болгон окуядан кийин Алмазбек Шаршеновичтин жүрөк оорусу күчөгөнү байкалды", — деди адвокат.
Эске салсак, 23-март күнү жактоочу Замир Жоошев Атамбаевди абактан күч колдонуу менен Биринчи май райондук сотуна алып келгенин билдирген. Анын айтымында, № 47 колониянын кызматкерлери аны абактан футболка, ич кийимчен мажбурлап алып чыгып конвоирлерге өткөрүп берген. Эртеси Атамбаевдин тарапташтары ага жасалган мамилеге нааразы болуп түрмөнүн алдында митинг уюштурган.
Андан көп өтпөй Кыйноолорду алдын алуу борбору мурдагы Атамбаев аталган окуяга байланыштуу абакка барып, экс-президенттен кабар алган. Маектешүү учурунда Атамбаевдин буту-колу көгөргөнү аныкталганын билдирип, ал жана башка жагдайлар боюнча бир нече акт түзүшкөн. Белгиленген фактылар боюнча Кыйноолорду алдын алуу борбору тиешелүү органдарга кайрылуу жибере турганы айтылган. Андан сырткары акыйкатчынын өкүлдөрү да барган.
"Эки күндөн бери кан басымы туруктуу болбой жатканын билдирип, бутундагы такты көрсөттү", — деп билдиришкен алар.
Атамбаевди сотко алып келгени боюнча ЖАК өзүнүн маалыматын тараткан. 25-мартта президент Садыр Жапаров да бул окуя тууралуу үн каткан.