БИШКЕК, 28-мар. — Sputnik. Баткенде жүрөгү кармап каза болгон журналист Арзыгүл Галымбетованын өлүмүн тергөөнүн алкагында 33 жаштагы Б.Ж. аттуу аял кармалды. Бул тууралуу Баткен облустук милициянын маалымат кызматы кабарлады.
Билдирүүгө ылайык, 25-март күнү журналист Баткен облустук милициясына келип "Батма-бат" Youtube каналында иштеген блогер кыз менин аброюма шек келтирип, жаман сөздөр менен каралап жатат деген таризде арыз жазган.
"Арыз милициянын маалыматтардын электрондук журналына катталган. Ошол эле күнү арыздануучу (Галымбетова - ред.) чыр-чатактан соң ден соолугу начарлап, саат 20.00дөр чамасында Баткен облустук бириккен борбордук ооруканасынын неврология бөлүмүнө кайрылат. Галымбетовага дарыгерлер жардам көрсөткөндүгүнө карабай түн ичинде каза болуп калган", — деп айтылат таратылган маалыматта.
Баткен милициясы ошол арыздын негизинде Кылмыш-жаза кодексинин 127-беренеси ("Этиятсыздыктан өлүмгө алып келүү") менен кылмыш ишин козгоп, тийиштүү экспертизалар дайындалганы айтылды.
"Тергөө иштеринин негизинде Баткен шаарынын 33 жаштагы тургуну Б.Ж. аттуу жаран кармалып, убактылуу кармоо жайына киргизилген. Учурда тергөө иштери жүрүп жатат", — деп билдирди милициядан.
Эске салсак, 37 жаштагы Арзыгүл Галымбетова 2010-жылдан бери АКИpress маалымат агенттигинин Баткен облусундагы кабарчысы болуп иштеп жаткан. Ал 26-мартка караган түнү жүрөгү кармап көз жумганы кабарланган.
Жаңылыктарды кыска жана ыкчам окугуңуз келсе Telegram-каналыбызга катталыңыз.