БИШКЕК, 25-мар. — Sputnik. Илимпоздор узак өмүр сүргөн адамдар кандай тамактанарын изилдеп, алардын сырлары менен бөлүшкөнүн РИА Новости жазды.
Билдирмеге караганда, дүйнө жүзүндө 100 жаштан өткөндөр көп жашаган жерлер аныкталган. Бул тизмеге Италиядагы Сардиния, Япониядагы Окинава, Грециядагы Икария жана Коста-Рикадагы Никоя аймактары кирген. Ал жакта жашагандардын дээрлик бардыгынын тамактануу адаттары окшош. Баары тең дан, буурчак азыктарын көп жеп, кызыл шарап ичишери белгилүү болду.
Окумуштуу Дэн Бюттнердин айтымында, бул аймактагылар айрым тамак-ашты жебегенге аракет кылышат. Маселен, тез татым. Ал кан басым менен холестерин деңгээлин жогорулатат. Ошондой эле адамды семиртип, инфарктка жеткириши ыктымал.
"Ундан жасалган тамак, канты көп азык жана газдалган суусундуктан баш тарткан оң. Кумшекер жүрөк-кан тамыр ооруларын, диабетти чакырып, өмүрдү кыскартышы ыктымал", — деген Бюттнер.
Ал этти (кызыл эт) акырындык менен азайтуу керектигин айтып, колбасадан таптакыр баш тартууну сунуштаган.