БИШКЕК, 25-мар. — Sputnik. Акыйкатчынын өкүлдөрү № 47 түзөтүү мекемесине барып, анда жаза өтөп жаткан мурдагы президент Алмазбек Атамбаев менен жолукту. Укук коргоочулар мамлекеттин мурдагы башчысынан 23-мартта Биринчи май райондук сотунун алдында болгон окуя боюнча пикирин угушту.
"Алмазбек Атамбаевдин айтымында, 23-мартта ал сотко бара албастыгы тууралуу арызын бергенине карабастан, он чакты киши келип сотко мажбурлап жеткиришкен. Ошондой эле ал бул ишти өзүнө карата басым катары баалаганын айтты. Эки күндөн бери кан басымы туруктуу болбой жатканын билдирип, бутундагы такты көрсөттү", — деп айтылат Акыйкатчы институту тараткан билдирүүдө.
№ 47 түзөтүү мекемесинин имаратында дайыма видеокөзөмөл жүргүзүлгөнүнө байланыштуу Акыйкатчы институтунун, Кыйноолордун алдын алуу улуттук борборунун өкүлдөрү видеокөзөмөлдүн жазууларын көрсөтүүнү талап кылышкан. Бирок андагы видеону көрүүгө мүмкүн болгон эмес.
"Мекеменин жетекчилигинин айтымында, видеону борбордук аппараттан гана көрсө болот. Бул боюнча жеринен акт түзүлүп, жазылган видеону берүү талабы Жазаларды аткаруу кызматына жөнөтүлдү", — деп айтылат маалыматта.
Андан сырткары, Атамбаевди тез арада медициналык кароодон өткөрүү боюнча талап коюлуп, бирок ал текшерилүүдөн жана арыз жазуудан баш тартканы айтылды.
Акыйкатчы институтунун өкүлдөрү аталган абакта жаткан башка жаза өтөөчүлөр менен дагы пикир алышты.
23-март күнү жактоочу Замир Жоошев Атамбаевди абактан күч колдонуу менен Биринчи май райондук сотуна алып келгенин билдирген. Анын айтымында, № 47 колониянын кызматкерлери аны абактан футболка, ич кийимчен мажбурлап алып чыгып конвоирлерге өткөрүп берген. Эртеси Атамбаевдин тарапташтары ага жасалган мамилеге нааразы болуп түрмөнүн алдында митинг уюштурган.