Германияда төрөлүп, Түркияда билим алдым. Эмгек жолумду Кыргызстанда физика мугалими болуп иштөөдөн баштадым. Бул аралыкта Таласта беш жыл физикадан сабак берип, учурда Оштогу мектептердин биринде балдарды окутам. 2013-жылдан бери сүрөтчүлүккө абдан кызыгып, Кыргызстандын бардык булуң-бурчун кыдырып, жаратылышынын кооздугун көрсөтүүгө аракет кылып келем. Сүрөтчүлүк — хоббим. Бул тууралуу Зафер Динчер Sputnik Кыргызстан радиосунда маек куруп жатып билдирди.
Анын айтымында, уюлдук телефондун камерасына тартылып, "Тоонун баласы" деп аталган сүрөттөр топтому (кызыл жүздүү, кымыз кармаган кичинекей баланын сүрөттөрү) инстаграм баракчасында эң көп жактырууну алып, сүрөтчү мугалимди бүткүл Кыргызстанга тааныткан.
"Сүрөткө тартуунун аркасында мен көп жерлерди кыдырдым, укмуштуу окуяларды баштан өткөрдүм, жаңы адамдар менен тааныштым. Кыргызстандын айылдарында сени такыр тааныбаган адамдар үйлөрүнө чакырып, чай берип, жылуу тосуп алышат. Кыргыздардын меймандостугу башка элде жок. Ошондуктан ким тосуп алат, каякка түнөйм деп ойлонбостон каалаган аймакка сапарга чыга берем. 2019-жылы Маданият, маалымат жана туризм министрлиги мага "Мыкты сүрөтчү" деген наам берди. Мындан беш жыл мурда Ноокатта болгон улак оюнун чагылдырган элем. Ал сүрөтүм дүйнөлүк сайтта "Күндүн сүрөтү" деп тандалган. Кыргызстанга келгениме 18 жыл болду. Анын 12 жылы түштүк регионунда өттү. Менин сүрөттөрүмдүн көбү Ош, Жалал-Абад, Баткен аймактарында тартылды. Кыргызстандын кооз пейзажы, айыл турмушу жана көк бөрүдөгү кызыктуу кадрлар көп. Ал эми менин досум, фотограф Ахмет Догандын сүрөттөрүндө Кыргызстандын түндүк аймактары чагылдырылган. Ошондуктан биз биригип өлкөнүн кооздугун көрсөтө турган китеп, мындайча айтканда, фотоальбом чыгарганы турабыз. Бул кыргызстандыктарга бизден эстелик жана чет өлкөлүк туристтер үчүн өлкөнү таанытуу китеби болот. Бир нече айдан кийин биздин эмгекке күбө болосуздар", — деди Динчер.
Ал ар бир көк бөрү оюнун калтырбай, кызыктуу кадрларды тартууну жактырарын жана 10го жакын аспапта ойной аларын кошумчалады.