БИШКЕК, 23-мар. — Sputnik. Мурдагы президент Алмазбек Атамбаевди Биринчи май райондук сотко алып келишип, бирок ал автоунаадан чыгуудан баш тартты. Бул туурасында анын жактоочусу Замир Жоошев билдирди.
"№47 абактагы камерадан аны футболкачан жана ич кийимчен күчтөп алып чыгышып, күзөтүп жеткире тургандарга тапшырышкан. Алар Атамбаевди ушундай карда алып жүрүүгө акысы барбы? Ага сот эмес, ден соолугу маанилүү, андыктан автоунаадан чыкпай койгон. Атамбаевдин ден соолугунун начар экендиги эксперт-медиктердин чыгарган бүтүмүндө жазылган", — деди жактоочу Жоошев.
Ал сүйлөшүүлөрдөн кийин кайра мурдагы президентти №47 абакка алып жөнөшкөндүгүн айткан. Кой-Таш боюнча соттук отурум анын катышуусуз башталган.
Жакында, 15-мартта, Жогорку Сот мурдагы президент Алмазбек Атамбаевди крим төбөл Азиз Батукаевдин иши боюнча 11 жылга эркинен ажыраткан буга чейинки сот өкүмүн күчүндө калтырган чечим чыгарган.
Биринчи май райондук соту 2020-жылдын июнь айында Атамбаевди аталган иши боюнча 11 жыл эки айга кескен. Бишкек шаардык соту бир айдан кийин райондук соттун чечимин күчүндө калтырган.
Жаңылыктарды кыска жана ыкчам окугуңуз келсе Telegram каналыбызга катталыңыз.